Мајсор (Mysore) е град во јужна Индија, каде што се родила и се развила традицијата на Аштанга јога. Праксата почнувала многу рано: асана – пранајама – мантра – медитација – философија. Секој вежбал самостојно во свој ритам, под директно водство и асистенција од учителот. Според оваа традиција, денес низ целиот свет, мајсор праксата го носи името на овој град и се практикува како најчеста форма за практикување аштанга јога.
Што е мајсор час?
Мајсор часот не е „класичен“ групен час каде се вежба синхронизирано под водство на инструкторот, туку секој практикант ја вежба својата серија (цела или скратена), во сопствено темпо, со индивидуално водство и асистенции од инструкторот.
Секој вежба сам, а сите вежбаат заедно
Во салата сите вежбаат тивко, секој е во свој фокус, инструкторот се движи низ просторот, коригира, објаснува тивко кај секој поединечно доколку има потреба, и гради однос 1 на 1 со секој практикант. Мајсор часовите имаат моќна и многу смирена атмосфера.
Како изгледа еден час?
- Се пристигнува во било кое време во рамките на терминот, со внимание да се заврши до предвидениот крај.
- Секој почнува самостојно со почетните асани по редослед – поздрави на сонцето A и Б и сите стоечки асани.
- Асаните се вежбаат по ред, секој практикант со своето знаење, доколку нешто е непознато има помошни листови или се чека за помош.
- По традиција, нови асании се додаваат само кога се совладани претходните, и има таканаречени gateway асани кои треба да се совладаат за да се оди на следните. Сепак, може да се заобиколи традицијата и да се напредува понатаму со модификации, за да може да се искусат сите асани од сериите кои се достапни во тој момент за практиканот.
- Без разлика колку трае централниот дел, секој завршува со ресторативните завршни асани, кратки пранајами и шавасана.
На овие часови нема брзање, практикантите се ослободуваат од споредби, секој го дава најдоброто од себе и на долг рок се напредува безбедно и стабилно во свое темпо.
Зошто мајсор праксата е идеална и за почетници?
Иако на прв поглед изгледа „напредна“, мајсор праксата е најбезбедниот и најприродниот начин за почеток, затоа што секој вежба колку може, без групниот притисок и брзото темпо што понекогаш е потешко да се следи доколку е часот подинамичен. Исто така, не мора да се знае многу, доволно е малку познавање и волја за вежбање и учење. Најважно е што секој може да дише во сопствен ритам.
Флексибилноста на часовите
Една од најубавите работи кај мајсор е слободата. Може да се дојде на почеток или подоцна, да се остане 30, 60 или 90 минути. Секој вежба повеќе или помалку во зависност од енергијата и си го прилагодува интензитетот според според силата и флексибилноста, и според тоа како се чувствува тоа утро.
Мајсор часовите се одличен начин да се постави база за индивидуална домашна пракса и да се научат сериите за полесно следење на групните водени часови.